"Тожоогийн Болдоо нь 1990 оноос эхлэн одоог хүртэл тус компанийн монтёр, бригадын дарга, кабелийн мастер, ашиглалтын инженер, угсралтын хэсгийн ахлагч, ээлжийн инженер, кабель шугамын засварын хэсгийн ахлагч, нөхөн сэргээлт хариуцсан инженерээр тасралтгүй 31 дэх жилдээ ажиллаж байна. Тэрээр энэ хугацаанд кабелийн гидропресс ашиглан шина таслагч, матагч, цоологч зэрэг олон үйлдэлд ашиглах боломжтой иж бүрэн багаж, трансформаторын ул, сампин резинүүдийг зүсэгч, зорогчийг санаачлан хийж компанийн эдийн засагт хэмнэлт гаргаж байснаас гадна хэрэглэгчдийг цахилгаан эрчим хүчээр хангах, түгээх сүлжээний найдвартай ажиллагааг дээшлүүлэхэд ЦДАШ, ЦДКШ-уудын угсралтын ажлын гүйцэтгэлийг чанарын өндөр түвшинд хийхэд онцгой ур чадвар гарган ажиллаж чадсан.
Мөн нийслэлийн цахилгаан хангамжийн 0.4-10 кВ-ын тоноглолуудыг евро стандартаар иж бүрэн шинэчлэх төслийн техник, угсралт хариуцсан дэд ахлагчаар ажиллаж, төслийг амжилттай гүйцэтгэсэн.
Хариуцсан ажилдаа эзэн болж ирсэн Тожоогийн Болдоогийн шинэ санаачилга, кабелийн засвар үйлчилгээг чанартай хийн, залуу үеийг бэлтгэн сургаж ирсэн мэргэжлийн ур чадвар, хэрэглэгчийг цахилгаан эрчим хүчээр хангах үйлсэд оруулсан хувь нэмрийг өндрөөр үнэлж, компанийн “Хүндэт дэвтэр”-т бичин алдаршуулав."